Felagslóg fyri Vága Bjargingarfelag 

§ 1.      Navn felagsins er Vága Bjargingarfelag. Felagið umfatar Vágarnar og Mykines.
Heimstað felagsins er Vágarnar. 

§ 2.      Felagið er sjálveigandi stovnur og hevur sum endamál at veita hjálp, tá ið á stendur á sjógvi og landi, at vekja ans fyri bjarging, at útvega bjargingartól, at venja fólk til at nýta tey, at arbeiða fyri, at eitt bjargingarskip verður til taks, og at ein bjargingar- og sjúkraflutningsbilur verður til taks í Vágunum. Felagið eigur at samstarva við onnur feløg við sama endamál og má kunna ganga í landsfelagsskap við øðrum bjargingarfeløgum í Føroyum. 

§ 3.      Sum limir kunnu gerast kommunur, onnur feløg og einstaklingar. 

§ 4.      Limagjaldið verður ásett av ársaðalfundinum. Limagjaldið fellur til gjaldingar 1. apríl á hvørjum ári. Kvittan fyri limagjald er atgongumerki til felagið. Limir, ið ikki hava goldið aftaná tvær krevjingar, missa limarættin. 

§ 5.      Felagið heldur ársaðalfund í mars mánaði. Aðalfundur verður lýstur alment við 8 daga freist við hesi dagsskrá: 

1.   Frágreiðing um felagsins virki í farna árinum
2.   Framløga av á jour førdum roknskapi
3.   Val av nevnd og 7 tiltaksmonnum
4.   Val av 2 grannskoðarum
5.   Ymiskt 

§ 6.      Aðalfundurin hevur hægsta ræði í øllum viðurskiftum felagsins.
Atkvøðurætt á aðalfundi hava allir limir. Kommunur ella feløg verða umboða av einum limi hvør. Eykaaðalfundur kann haldast, tá nevndin avger tað. Í øðrum førum kunnu í minsta lagi 25 limir krevja eykaaðalfund við samstundis at tilskila eina dagsskrá.
Aðalfundurin velur ein fundarstjóra til at stýra fundinum.
Allar avgerðir á aðalfundinum krevja vanligan meiriluta.
Lógarbroytingar og avtøka av felagnum kunnu bert gerast á ársaðalfundinum og krevja 2/3 meiriluta av teimum, sum møttir eru. 

§ 7.      Í nevndina verða valdir 7 limir. Miðast skal ímóti at hava eitt umboð úr hvørjari bygd í sýsluni, sum sita til næsta vanliga ársaðalfund. Næsta ársaðalfund fara 2 frá, annan ársaðalfund 2 og triðja 3. Hetta verður tey fyrstu árini gjørt við lutakasti.
Fráfarandi nevndarlimir kunnu verða afturvaldir. Nevndin skipar seg við formanni, næstformanni, kassameistara og umsjónarmanni, sum umsita ognir felagsins.
Nevndin velur sjálv skrivaran, sum kann vera uttanfyri nevndina hjá VBF.
Nevndin hevur fund, tá ið formaðurin ella næstformaðurin kallar til fundar, ella í minnsta lagi eina ferð um fjórðingsárið, ella tá tveir nevndarlimir krevja fund.
Fundirnir eru viðtøkuførir, tá ið 4 limir eru á fundi, og allar avgerðir krevja vanligan meiriluta.
Formaðurin hevur umsorgan fyri, at gerðabók verður førd um tað, sum fer fram á fundunum. Kassameistarin hevur umsorgan fyri, at limagjald verður uppkravt og roknskapur førdur. 

§ 8.      Nevndin ger eina til eina og hvørja tíð tíðarhóskandi arbeiðsreglugerð.

__________________________________________________________________________

 Henda felagslóg varð upprunaliga samtykt á fyrsta vanliga ársaðalfundi Vága Bjargingarfelags 14. mars 1975. Hon er síðan broytt á ársaðalfundum 26. mars 1977, 15. apríl 1978, 07. mei 2008, 26. mars 2009 og 14. apríl 2013

Annars kann verða upplýst, at Vága Bjargingarfelag varð stovnað 6. desembur 1974.