13. januar, kl. 20.00, var nevndarfundur heima hjá Sverra Nielsen.

          Møttir vóru: Sverri Nielsen, Ivan Johannesen, Karl Johan Nielsen, Jákup Jacobsen og Jógvan Elias á Løgmansbø.

          Formaðurin greiddi frá tí, ið fór framm 30. november og 2. desember 1976.

          Nevndin varð samd um at kanna møguleikarnar fyri at fáa hendur á einum grundstykki.

          Samtykt varð at skipa fyri einum samarittarskeið á byrjunarstigi         12/2-1977. Formaðurin lýsir um skeiðið og ásetur, hvar skeiðið skal verða.

          Formaðurin og næstformaðurin átóku sær at finna fram til tann, ið skal á næsta skeið í ambulansukoyring.

 Ivan Johannesen            K. J. Nielsen

Sverri Nielsen                 J. Jacobsen

24. februar, kl. 20.00, var nevndarfundur heima hjá Sverra Nielsen.

          Møttir vóru: Sverri Nielsen, Ivan Johannesen, Jón Joensen, Jákup Jacobsen, Karl Johan Nielsen og Ísak Jacobsen fyri froskm.

          Samtykt varð, at aðalfundurin verður hildin leygardagin, 26 mars 1977, kl. 20.00, á Ellisheiminum.

          Tað varð samtykt á aðalfundinum at skjóta upp hesa lógarbroyting viðvíkjandi § 7, stk. 1, pkt. 2: ” Næsta ársaðalfund fara 2 frá, annan ársaðalfund 2 og triðja tríggir”.

          Formaðurin greiddi frá, at samarittarskeið er í gongd við 15 – 18 luttakarum.

          Upplýst varð eisini, at Hergeir Christiansen hevur játtað at fara á komandi ambulansuskeiðið. Hann fer niður 5/3-1977.

          Viðvíkjandi spurningin um samarittarinstruktørskeið í Havn í juli í ár, var nevndin samd um, at Vága Bjargingarfelag eigur at peika á møguligar skeiðluttakarar.

          Tann norska samarittarpútan og samarittarkassin hjá Falck vórðu kannaðir.

K. J. Nielsen                   Jón Joensen

Ivan Johannesen           Sverri Nielsen

5. mars endaði grundskeiði í fyrstuhjálp, sum hildi hevur verið á skúlanum á Giljanesi. Instruktørurin Eyðbjørn Jacobsen handaði prógv til fylgjandi:

          Fríðgerð Petersen                     Sandavág
          Heini Nielsen                                  -
          Jonna Nielsen                                   -
          Ruborg Zachariassen                Sørvág
          Jóan Hendrik Zachariassen            -
          Ninna Thomasen                       Sandavág
          Niels Joensen                                   -
          Jóanes Niclasen                       Miðvág
          Neinbjørn Nattestad                         -
          Jónberg á Mýrini                       Sandavág
          Gunnvør Hansen                        Miðvág
          Helgi Hansen                                   -
          Torkil Haraldsen                        Sørvág
          Anna Hansen                             Miðvág
          Ólavur Hansen                                -

                               Sverri Nielsen

15. mars, kl. 22.45, varð leiting byrjað eftir einum 13 ára gomlum Sørvágsdreingi, ið var saknaður, aftaná at vinmenn hansara vóru farnir frá honum norði á Víkum.

          Um 70 – 80 mans úr øllum bygdum, luttóku í leitingini í sera ringum veðri.

          Leitingin endaði 16. mars 1977, kl. 02.15, tá drongurin varð funnin í øllum góðum í einum hjalli á Víkum.

Ivan Johannesen            Sverri Nielsen

24. mars, kl. 20.00, var nevndarfundur heima hjá Sverra Nielsen.

Møttir vóru: Sverri Nielsen, Ivan Johannesen, Karl Johan Nielsen og Jón Joensen.

          Sverri Nielsen upplýsti, at tað er nakað óvist við instruktørskeiðnum.

          Arbeiðsreglugerð varð gjørd.

Jón Joensen          K. J. Nielsen

Ivan Johannesen            Sverri Nielsen

26. mars, kl. 20.00, varð vanligur ársaðalfundur hildin á Ellis – og avlamisheiminum í Miðvági.

          Aðalfundurin var lógliga lýstur.

          Einir 25 limir vóru møttir.

          Formaðurin, Sverri Nielsen, bjóðaði vælkomin og Marni av Kák gav frágreiðing um felagsins virki.

          Kassameistarin, Karl Johan Nielsen, legði ársroknskapin fram, og hann varð góðkendur.

          Við lutakasti gingu Sverri Nielsen, John Magnussen og Dávur Joensen úr nevndini. Hesir blivu allir einmælt afturvaldir. – Íti Jákup Jacobsen er fluttur úr Mykinesi, valdi fundurin Eddie Lauritsen, Mykines, í hansara stað, og hann verður sjálvur at velja sær ein tiltaksmann.

          Tiltaksmenninir og grannskoðararnir afturvaldir.

          Uppskot um lógarbroyting varð einmælt samtykt. § 7, stk. 1, pkt. 2 er hereftir soljóðandi: ”Næsta ársaðalfund fara 2 frá, annan ársaðalfund 2 og triðja 3”.

          Upplýst varð av kassameistaranum, at

Inntøkurnar vóru                      11.362,90 kr

Ùtreiðslurnar vóru                    4.663,69 kr

Á bankakonto vóru                  6.699,21 kr

          Ivan Johannesen upplýsti, at roknskapurin (sjálvstøðugur) fyri bjargingarbilin balanserar við 7.695,00 kr, harav yvirskot, 2.407.45 kr.

          Tá Ivan Johannesen hevði greitt frá rakstur v.m. viðvíkjandi bjargingarbilinum, spurdi John Poulsen, um tað ikki kundi verða óheldugt, at bilurin verður nýttur uttan fyri oynna.

          Ivan Johannesen svaraði, at hetta ofta hevði verið umrøtt. Hann vónaði, at sjúkrahúsverkið – eftir tað hann hevði frætt – fór at útstationera ambulansur, og at ein bleiv her í oynni, so vit til sína tíð hava 2 bilar.

          Ivan Johannesen umrøddi leitingina 15. – 16. mars 1977 eftir dreinginum Marner Mortensen (Polla – Marner). Helt, at vit høvdu lært av leitingini. Hann førdi fram, at m.a. vóru menn ov illa fyrireikaðir; vóru illa klæddir eftir veðrinum, blivu kaldir, ongan mat við. Hann talaði um, at betur kontroll má havast við, hvørjir luttaka, og at teir eiga at verða skrivaðir upp onkustaðni, so at tað aftaná er gjørligt at vita, um allir luttakararnir eru afturíaftur komnir o.s.fr.

          Jákup Joensen (Dunga Jákup) helt fyri, at arbeiðsreglugerðin skuldi siga nakað um hetta, og at reglugerðin átti at verðið sligin upp.

          Sverri Nielsen bar ein takk fram frá teim avvarandi hjá Polla Marner fyri leitingina, og hann styðjaði uppskotið frá Dunga Jákup.

          Frits Jacobsen fyrislóg, at leitingarfólk eigur at hava walkie-talkie´s, sum Bjargingarfelagið skuldi framvega.

          Ivan Johannesen og Hans Arni Nielsen tóku undir, og løgdu dent á at tað eisini í arbeiðsreglugerðini verður mint á at hava nokk av battaríðum við. – Hans Arne helt fram, at tað skuldi vera plikt at boða frá, tá man var komin aftur frá leiting o.t.

          Hans Elmar Poulsen fyrislóg, at felagið eigur at hava einar 100 – 150 lyktir at býta út undir leiting.

          Ivan Johannesen fannst at, at tað yvirhøvur bleiv gingið ov skjótt undir leitingini.

          Dávur Joensen greiddi frá, hvussu teir høvdu leitað og funnið Polla – Marner. Teir høvdu hundar við. Drongurin hevði fortalt, at hann var sovnaður undir Miðgjógv, men tá tað var blivið myrkt leitaði hann oman í hjallin. Teir góðu honum sjokolátu og heitan drekkamunn, áðrenn tað varð farið til gongu til Gásadals.

          Uppá fyrispurning frá Frits Jacobsen varð upplýst um leiðsluspurningin.

          Leif Aalykke bar fram uppskot frá Vága Froskmannafelag um, at gjørdur verður ein vognur til bjargingarbátin.

          Hann fyrislóg eisini, at man undir leiting á nátt nýtir hvítt fallskermsbluss.

          Ivan Johannesen helt at vognspurningurin skuldi takast undir nevndarviðgerð. Samstundis upplýsti hann, at L.F.B. hevði søkt um at koma við á fíggjarlógina 1977/78.

          Jákup Joensen kom inn uppá spurningin um betur fyribyrging av vanlukkum, t.d. brúk av bjargingarvestum umborð á bátum.

          Hans Arne Nielsen helt, at eitt transportabult ljósanlegg hevði verið gott at átt.

           Orðaskifti um leyst og fast var annars lívligt.

          Limagjaldið varð sett til 30 kr – óbroytt frá seinasta ári.

Ivan Johannesen            K. J. Nielsen

John Magnussen            Sverri Nielsen

19. apríl, kl. 20.00, varð nevndarfundur hildin heima hjá Sverra Nielsen í Sandavági.

          Møttir vóru: Sverri Nielsen, Ivan Johannesen, Jón Joensen, Karl Johan Nielsen, John Magnussen; og Ìsak Jacobsen og Hans Olaf Debes møttu fyri Vága Froskmannafelag.

          Hetta var fyrsti nevndarfundur aftaná aðalfundin, og nevndin skipaði seg soleiðis:

          Formaður             Sverri Nielsen
          Næstformaður     Ivan Johannesen
          Kassameistari     Karl Johan Nielsen

          Ivan Johannesen læs referatið yvir stovnandi aðalfundin hjá L.F.B. í Havn 11. desember 1976 og ta á aðalfundinum viðtiknu lógina fyri L.F.B.

          Ynskiseðilin til landfútan og marinustjóran varð viðgjørdur. Liðugt skrivaði ynskiseðilin, ið umfatar ynskini hjá Vága Bjargingarfelag og Vága Froskmannafelag, varð handaður Ivan Johannesen, formanni L.F.B.s.

          Samtykt varð at lata gera vogn til gummibátin.

          Tosað varð um at fáa eina venjing í lag, og tá at royna at fáa nakrar ungar menn við.

                              Jón Joensen

John Magnussen                      K. J. Nielsen

Ivan Johannesen                      Sverri Nielsen

23. mai, kl. 20.00, varð nevndarfundur hildin heima hjá Sverri Nielsen.

          Møttir vóru: Sverri Nielsen, Ivan Johannesen og Karl Johan Nielsen.

          Ivan Johannesen legði framm skriv frá 18/5-1977 frá Reyða Krossi (H. E. Jacobsen) til L.F.B., har tað verður sagt frá, at tann 3 ambulansan fer úr Esbjerg 6. juni 1977 til Føroya, har hon skal støðast í Kollafirði. H. E. Jacobsen kemur við sjálvur annar. Ivan Johannesen hevur lagt reisuprogramm í Føroyum.

           Sagt varð frá, at eitt skeið fyri instruktørar fyri fyrstuhjálparskeið verður í Havn 2. til 15. juli 1977. – Roynt verður at fáa 2 manns úr Vágunum til hetta instruktørskeiði.

          L.F.B. hevur boðað til aðalfund í Fuglafirði 25. mai 1977.

          Fundurin samtykti at velja Ivan Johannesen í nevnd L.F.B.s. við Karl Johan Nielsen sum tiltaksmann. – Fundurin er greiður yvir, at hann ikki er viðtøkuførur, men avgjørdi valini við forvæntaðari góðkenning seinni.      

          Tosað varð um, at tað kundi verið hent at fingið eina instruktión um innrætting við meira av teim Boeing-jetmaskinunum, sum nú flúgva hendavegin. – Marni av Kák lovaði at tosað við Hugo Fjørðoy um henda spurning.

                               K. J. Nielsen

Ivan Johannesen                      Sverri Nielsen

25. mai, kl. 20.00, var aðalfundur í L.F.B. á restaurant Muntra í Fuglafirði.

          Frá Vága Bjargingarfelag luttóku: Sverri Nielsen, Ivan Johannesen, Karl Johan Nielsen og Marni av Kák.

          M.a. varð á aðalfundinum samtykt, at 3 manns úr hvørjum bjargingarfelag skulu fara til bjargingarroynd á jóanssøku á Tvøroyri, sum L.F.B. skuldi standa aftan fyri.

Ivan Johannesen            Sverri Nielsen        K. J. Nielsen

10. juni hevði Vága Bjargingarfelag vitjan av H. E. Jacobsen og Poul Juul Andersen frá Dansk Røde Kors, sum vóru í Føroyum í samband við ambulansuni til Kollafjarðar.

          Sverri Nielsen og Ivan Johannesen tóku sær av teimum, og um kvøldið var Marni av Kák hjástaddur tá tosað var um ymist. M.a. varð tosað um spurningin um trygging av patientum, sum verða fluttir við ambulansunum.

          Hesin spurningur eigur at verða viðgjørdur á fyrst komandi nevndarfundi.

Ivan Johannesen                      Sverri Nielsen

26. juni luttóku fyri Vága Bjargingarfelag Sverri Nielsen, Hergeir Christiansen og Hans Arne Nielsen í bjargingarroynd á Tvøroyri, ið L.F.B. stílaði fyri í samband við Jóansøkuhaldinum.

                                      Sverri Nielsen

9. juli luttóku 11 limir úr Vága Bjargingarfelag í einum samarittarøvilsi, sum menn frá Reyða Krossi stílaðu fyri í Kollafirði. Luttakarar vóru eisini tey, ið gingu á instruktørskeið fyri samarittar.

Ivan Johannesen                      Sverri Nielsen

14. juli endaði instruktørskeiðið fyri samarittarinstruktørar. Frá Vága Bjargingarfelag var Ásmund Joensen úr Sandavági á skeiðnum, ið Reyði Krossur stílaði fyri.

          Lærarar á skeiðnum vóru: Preben Pedersen, Max Simonsen og Jørgen Chemnitz. Hesir vóru gestir hjá Vága Bjargingarfelag (Sverra Nielsen) á heimferðini.

                                      Sverri Nielsen

10. september vóru Sverri Nielsen, Ivan Johannesen og Karl Johan Nielsen til fundar í L.F.B. í Kollafirði, har Ivan Johannesen og Rólant Patursson greiddu frá teim tingingunum teir vegna L.F.B. hava havt í seinastuni við monnum frá politinum um útgerð o.t. til katastrofuhendingar gjøgnum danska sivilforsvarið.

Ivan Johannesen            Sverri Nielsen        K. J. Nielsen

14. september, kl.20.00, var nevndarfundur hjá Sverra Nielsen.

          Møttir vóru: Sverri Nielsen, Ivan Johannesen, John Magnussen, Jón Joensen, Dávur Joensen, Marni av Kák.

          Ivan Johannesen greiddi frá um fundirnar við løgregluna um bjargingarfeløgini viðvíkjandi bjargingarútgerð og viðurskiftini um bjarging í síni heild. Tosaði um ”ynskiseðilin” frá bjargingarfeløgunum, o.m.a. eisini um framvegan av ”leiðarataskum” við kortum, walkie-talkies og øðrum, um kassar við bjargingarútgerð til útplássini v.m.

          Ivan Johannesen bar uppá mál, at tað átti at fingist ein vaktarskipan í samband við koyringina av ambulansuni, og at tað í hesum sambandi átti at verða  framvega tey sonevndu ”pipparatól”. Fundurin varð samdur um at kanna henda spurning.

          Ivan Johannesen skjeyt upp, at Vága Bjargingarfelag sendir umsókn til Vága Felagskommunu um at framvega felagnum eitt grundøki uppá einar 700 m² at byggja hús á. Grundøkið eigur at liggja sentralt. – Hetta varð einmælt samtykt; at grundøki átti t.d. at liggja yvirav smiðjuni hjá J. K. Joensen & Sonur evt. norðan fyri nýggju politistøðini.

          Sverri Nielsen og Ivan Johannesen upplýstu, at L.F.B. arbeiðir við spurninginum viðvíkjandi einum búmerki felags fyri øll bjargingarfeløgini.

Ivan Johannesen            Jón Joensen

John Magnussen            Sverri Nielsen

11. november, kl. 21.00, var nevndarfundur hjá Sverra Nielsen.

          Møttir vóru: Sverri Nielsen, Ivan Johannesen, John Magnussen og Karl Johan Nielsen. Marni av Kák.

          Samtykt varð at hava eitt grundskeið í fyrstuhjálp miðjan januar 1978. Sverri Nielsen skal tosað við Ásmund Joensen um tað.

          Tað varð eisini samtykt at hava eitt uppfrískningsskeið fyri samarittar. Hetta skal Sverri Nielsen eisini tosað við Ásmund Joensen um.

          Spurningurin um at organisera nakrar bólkar til serstakar hjálpiuppgávur varð útsettur til serstakan fund.

          Ivan Johannesen orienteraði um eitt tilboð, sum Storno hevur givið uppá radiotelefon í ambulansurnar.

K. J. Nielsen