|
1976
30, januar,
kl. 20.00,
var nevndarfundur heima hjá Sverra Nielsen.
Møttir vóru: Sverri Nielsen, Ivan
Johannesen, Karl Johan Nielsen, Anton Guttesen og Marni av Kák.
Formaðurin greiddi frá, at hann fyri
stuttum hevði verið á skrivstovuni hjá Føroya Vanlukkutrygging
og spurt seg fyri um trygging av aktivum limum í
bjargingarfelagnum. Hann hevði fingið at vita, at t.d. Havnar
Bjargingarfelag hevði eina skipan viðvíkjandi trygging ímóti
vanlukkum.
Samtykt varð at skriva til Føroya
Vanlukkutrygging og biðja um at fáa teknaða eina trygging.
Samtykt varð at hava eina
bjargingarvenjing í Miðvági leygardagin 21. februar 1976
seinnapartin.
Samtykt varð at fáa í lag eitt
samarittarskeið. – Sverri Nielsen greiddi frá, at hann hevði
tosað við Reyða Kross í Havn um hetta mál.
Samtykt varð at hava vanligan
ársaðalfund leygardagin 27. mars 1976 í Sørvági.
Samtykt varð at søkja til Føroya
Landsstýri um at fáa afturgoldnan tann tollin, sum felagið hevur
goldið fyri tær rakettir og løðingar, sum tað hevur keypt úr
Onglandi.
Tosað varð eisini um
hølistrupuleikarnar, felagið hevur at dragast við. Sum er, hevur
Sverri Nielsen sumt av útgerð felagsins liggjandi í kjallara
sínum, Ivan Johannesen hevur sumt, og luftkompressarin stendur í
tí gomlu smiðjuni hjá J. & K. Joensen.
Samtykt varð, at felagið vendir sær
til Jákup Haraldsen, á Tormansbakka, Miðvági, at spyrja hann um
møguleikan fyri at leiga høli í tí sokallaða ”Undirhúsinum” –
gamla verkstaði hjá Ellefsen – í Miðvági.
Samtykt varð, at felagið vendir sær
til Føroya Sjóvátrygging við fyrispurningi um stuðul til keyp av
einum sleipitrossa.
Sverri Nielsen
Ivan Johannesen
K. J. Nielsen
21. februar,
kl. 14.00, hevði felagið eina bjargingarvenjing við
kaiuna í Miðvági. – Fitt av fólki var og hjálpti til og hugdi
at. Ein frívillug innsavning til frama fyri felagið fór fram, og
henda gav í peningi 435,30 kr.
Venjingin byrjaði við at
demonstrera ein gummibjargingarbát, og hetta tókust
froskmenninir mest við.
Síðan varð skotið við línuútskjótara
umborð á ”Aldubáruna” – Sverri Nielsen gjørdi eitt plettskot! –
og tá endin var komin umborð, blivu froskmenn stjóraðir í land í
bjargingarstólinum.
At enda vístu froskmenninir, hvat
teir dugdu at standa á vatnskí, og samstundis sást, hvussu góður
og snúðuligur gummibáturin við páhangaranum í grundini er.
Sverri Nielsen
7. mars
byrjaði samarittarskeið á
skúlanum í Sørvági. Luttakararnir vóru 22 í tali. Leiðsluna
hevur Eyðfinn Jacobsen úr Havn.
Sverri Nielsen
16 mars,
kl. 18.30, varð fundur hildin heima hjá Ivan Johannesen.
Møttir vóru: Sverri Nielsen, Karl
Johan Nielsen, Ivan Johannesen og Marni av Kák.
Ársaðalfundurin, sum verður týsdagin
30. mars 1976, varð fyrireikaður. Fundurin verður lýstur eftir §
5 í lógini, og harumframt verður skotið uppá lógarbroyting,
hareftir síðsta petti í § 2 dettur burtur. Harafturat verður
skotið upp hækkan av limagjaldinum til 30 kr. árliga.
Sverri Nielsen
Ivan Johannesen
K. J. Nielsen
20. mars
endaði samarittarskeið á skúlanum
í Sørvági undir leiðslu av Eyðbjørn Jacobsen.
Tey 19, ið fingu prógv, vóru hesi:
Sverri Nielsen
30. mars, kl.
19.30, varð ársaðalfundur hildin í Sørvágs Bio. Aðalfundurin var lógliga
lýstur. Jens Erik Nielsen varð valdur
at vera fundarstjóri, aftaná at Sverri Nielsen hevði bjóða
vælkomin til teir knapt 50 limirnar, ið møttir vóru. Marni av Kák gav frágreiðing
um felagsins virki. Karl Johan Nielsen legði fram
roknskapin, ið var góðkendur. Við lutakasti fóru Ivan
Johannesen, Jákup Jacobsen og Jón Joensen úr nevndini. Teir vórðu allir afturvaldir,
eins og tiltaksmenninir, - einmælt. Eddie Lauritsen varð valdur
sum tiltaksmaður hjá Jákup Jacobsen. Báðir grannskoðararnir
afturvaldir. Tað varð einmælt samtykt at
strika stk. 3 í § 2. Tað varð samtykt at hækka
limagjaldið 1976 til 30 kr. Undir ymist greiddi Ivan
Johannesen frá um Landsfelag fyri Føroysk Bjargingarfeløg
(L.F.B.) Fundurin endaði við at vístur
varð filmurin ”Kuldi kann drepa”.
Sverri Nielsen
Ivan Johannesen
K. J. Nielsen
Jón Joensen
John Magnussen
13.
apríl,
kl. 19.00,
varð nevndarfundur hildin heima hjá Sverri
Nielsen í Sandavági.
Møttir vóru: Sverri Nielsen, Ivan
Johannesen, Karl Johan Nielsen, John Magnussen og Dávur Joensen.
Samtykt varð, at nevndin skipar seg
sum í farna ári.
Síðan varð ein bjargingarvenjing í
Gásadali umrødd. Marni av Kák segði seg vilja tosa við Súni
Vinther á politistøðini í Havn um tilrættisleggingina av eini
venjing, har avvarandi mynduleikar natúrliga luttaka.
At enda tosaði nevndin um spurningin
viðvíkjandi bjargingartól umborð á smærri førum. Samtykt varð at
heita á sýslumannin um at hava eftirlit við hesum fyri at fáa
menn til at hava tey lógarbundnu tólini í báti, tá teir fara á
flot.
Sverri Nielsen
Ivan Johannesen
K. J. Nielsen
John Magnussen
5. juni, kl.
13.15, hittu Sverri Nielsen og Marni av Kák á flogvøllinum
landssekretær Jørgen Petersen og afdelingsleder H. E. Jacobsen
frá Dansk Røde Kors.
Danskararnir blivu orienteraðir um
bjargingarfelagið og arbeiði tess v.m. – Teir vóru sera
áhugaðir, og so hvørt sum prátið gekk, fekkst varhugi av, at tað
ikki er óhugsandi, at okkurt gott kann spyrjast burturúr.
Tá talan kom uppá, at
bjargingarfelagið her – og kanska onkra aðrastaðni við – kundu
hugsað sær at havt eina ambulansu, søgdu teir, at tað skuldi
veri møguleiki fyri at fingið 1 til 3 slíkar brúktar fyri ein
bíligan pening frá Falck/Zonen, ið skal skifta út. Prísurin fór
kannska at liggja um 10 – 15.000 kr. stykkið.
Avtalað varð, at vit skuldu halda
sambandið viðlíka.
M. av Kák
Sverri Nielsen
23 juli,
kl. 21.00, var nevndarfundur hjá Ivan Johannesen.
Møttir vóru: Sverri Nielsen, Ivan
Johannesen, Karl Jóhan Nielsen og Jón Joensen.
Sverri Nielsen greiddi frá fundinum
við monnunum frá Danska Røde Kors 5. juni 1976, og serliga varð
nevnt um teir 3 bilarnar.
Sverri Nielsen og Ivan Johannesen
upplýstu, at teir vildu fara ein túr niður at hyggja at bilunum,
at Reyði Krossur vildi gjalda billettina hjá Sverra og
Landsstýrið fyri Ivan (fyri Landsfelagið), og teir annars vildu
kanna, hvussu Falck arbeiðir.
Fundurin avgjørdi, at Sverri Nielsen
og Ivan Johannesen skuldu fara niður 27. juli 1976.
Sverri Nielsen
Ivan Johannesen
K. J. Nielsen
Jón Joensen
27. juli,
fóru Sverri
Nielsen og Ivan Johannesen til Danmark við flogfari, og teir
komu aftur 30. juli.
Niðri vóru teir gestir hjá Dansk
Røde Kors, sum setti teir í samband við Falck & Zonen, har
greitt varð frá hvussu teir arbeiða, hvørja útgerð teir brúka,
og har sóðu teir eina av teim ambulansunum, sum koma hendanvegin.
Teir fingu eisini høvi til at síggja eina samarittarstøð hjá
Reyða Krossi.
Sverri og Ivan samráddust eisini við
leiðaran fyri Redningstekniske Institut, Åge Rørmark, ið hevur
við ymisk skeið viðvíkjandi bjarging um hendi. Rørmark lovaði at
vera til hjálpar í øllum spurningum viðvíkjandi
bjargingartænastu.
Sverri Nielsen
12. novembur,
kl. 09.30, kom bjargingarbilurin á land á Oyragjógv. Við vóru
Jørgen Pedersen og Ole Falck, sum Sverri Nielsen tók ímóti. –
Kl. 10.00 var hann vístur framm á Ellisheiminum.
Kl. 20.30 varð samkoma hildin í kantinuni
hjá Bjarna Joensen, har bodnir vóru nevndarlimir, tiltaksmenn,
bygdaráðslimir,brandmenninir, froskmenn, leiðslan á flogvøllinum
og ellisheiminum.
Aftaná at bjargingarbilurin var
demonstreraður, var bjóðað kaffi og kakur, og prikklottaríið hjá
Reyða Krossi roynt.
Ivan Johannesen
Sverri Nielsen
21. novembur,
vóru
Sverri Nielsen, Ivan Johannesen og Marni av Kák eftir innbjóðing
frá Fuglafjarðar Bjargingarfelag í Fuglafirði, í helt stovnandi
aðalfund, fyri at greiða frá, hvussu Vága Bjargingarfelag varð
stovnað.
Sama dag kl. 17.30 varð teirra
bjargingarbilur fyri fyrstu ferð í brúk (flutti eina barsilskonu
út á Toftir).
Ivan Johannesen
Sverri Nielsen
23.
novembur,
kl. 21.00,
var nevndarfundur hjá Ivan Johannesen.
Møttir vóru: Sverri Nielsen, Ivan
Johannesen, John Magnussen og Jón Joensen.
Einmælt varð viðtikið, at Ivan
Johannesen fer niður á skeið í januar – februar 1977 í
ambulansukoyring, sum Reyði Krossur skipar fyri.
Sverri Nielsen
Ivan Johannesen
Jón Joensen
John Magnussen
25.
november,
kl. 11.15, varð okkara bjargingarbilur fyri fyrstu ferð
nýttur til flutning av einum børupatienti. Tað var ein eldri
kona, sum kom við flogfarinum úr Danmark saman við sjúkrasystir,
ið skuldi flytast til landssjúkrahúsið í Havn.
John Magnussen koyrdi bilin henda
dagin.
Sverri Nielsen
30.
november,
kl. 10.30, hittust í kontroltorninum á flogvøllinum fútin
M. Nepper-Christensen, politiassesor F. Cohn, flúgvuleiðari
Trygvi Askham, havnaavdeilingsleiðari Erik Jørgensen, Sverri
Nielsen, Ivan Johannesen, Rudy Joensen, Marni av Kák og Leif
Aalykke.
Endamálið við hesi ”samkomu” var at
fáa høvi til at heilsa hvør uppá annan og hvør gera annan
kunnugan við bjargingarviðurskifti, reiðskap v.m.
Ivan Johannesen
Sverri Nielsen
2.
desember,
kl. 10.30, tosaðu Sverri Nielsen og Ivan Johannesen við
Erik Jørgensen á flogvøllinum.
Endamálið var at spyrja, um tað er
møguligt, at Vága Bjargingarfelag yvirtekur tað gomlu garafuna
hjá Statens Luftfartsvæsen. Erik Jørgensen, sum var sera
positivt innstillaður yvirfyri bjargingarfelagnum, helt
møguleikin var til tess, og hann vildi lata frætta í næstum. |