Jón Joensen, Anton Guttesen, Ivan Johannesen, Sverri Nielsen og Marni av Kák.

Úti í Bø demonstreraðu klaksvíkingarnir línuútskjótara; men vegna umstøðurnar – knøpp tíð, myrkur o.s.fr. – fingu bert Sverri, Jón og Ivan høvi til at luttaka.

Aftaná demonstratiónina av línuútskjótingini hittust allir omanfyri nevndu í Sørvági, har klaksvíkingarnir vegna Norðoya Bjargingarfelag handaði Vága Bjargingarfelag fylgjandi:

          1 børa
          1 línu 240 favnar 14 mm (rundloypandi við blokki)
          1 boya
          1 lína 120 favnar 16 mm
          1 lína við 2 blokkum
          1 bjargingarstól komplettur
          2 miðubeltir
          1 línu
          2 glasfipurhjálmar
          2 knívar
          10 flatar lummalyktir
          1 lykt (4 battaríðir á 1,5V)
          15 sett oljuklæðir

Síðan greiddu klaksvíkingar frá ymsum av áhuga viðvíkjandi bjarging og uppgávur bjargingarfelagsins, og tosað varð aftur og fram um ymisk áhugamál.

At enda upplýstu teir, at íslendski bjargingarfilmurin frá Látrabergi var á veg, og at Vága Bjargingarfelag skuldi lána hann fyrst til framvísan.

M. av Kák                             Sverri Nielsen

Ivan Johannesen                    Jón Joensen

24. januar møttu hesir á fund á ellisheiminum: Sverri Nielsen, Jens Erik Nielsen, John Frederiksen, Ivan Johannesen, John Magnussen, Anton Guttesen og Marni av Kák fyri at síggja íslendska bjargingarfilmin og tosa um, hvussu framm skal verða farið við almennari frammvísan, tekning av limun o.s.fr.

Tað var lagt Sverra, Ivan, Jens Erik og Marni í hendi at leggja kvøldini til rættis.

M. av Kák                                   Sverri Nielsen

Ivan Johannesen                         John Magnussen

25. januar Flogvanlukka – eingin mannskaði.

27. januar hittust Ivan Johannesen, Sverri Nielsen, Jens Erik Nielsen og Marni av Kák í Sandavági og gjørdu av at halda almennar fundir í Miðvági á Ellisheiminum 29. januar, í Sandavági í losjuni 30. januar og í Sørvági í Sørvágs Bio 31. januar, øll kvøldini kl. 20 við hesum programmi í høvuðsheitum:

1.         Frágreiðing um Vága Bjargingarfelag
2.         Demonstratión av mini – bjargingarstóli
3.         Frammvísan av íslendska bjargingarfilminum
4.         Tekning av limum

Lýsingar í útvarpi, Tíðindabløðum og við uppsløgum í bygdunum.

Ivan skuldi taka sær av frammvísanini við frammvísara hjá Ellisheiminum.

M. av Kák                   Sverri Nielsen                     Ivan Johannesen

29. januar varð almennur fundur á Ellisheiminum. Væl av fólki var samankomið – umleið 80 fólk.

43 teknaðu seg sum limir.

30. januar varð almennur fundur í losjuni í Sandavági. Umleið 80 fólk vóru samankomin.

46 teknaðu seg sum limir.

31. januar varð almennur fundur í Sørvágs Bio. Umleið 110 fólk vóru samankomin.

61 teknaðu seg sum limir.

Á hesum trimum nevndu fundum varð greitt frá um Vága Bjargingarfelag, íslendski bjargingarfilmurin undir Látrabergi vístur, og demonstratión av einum modelli av einum bjargingarstóli.

Um felagið varð í stuttum sagt frá, frá tí at Sverri Nielsen av fyrstan tíð á sumri í 1974 var í samband við umboðsmenn frá Norðoya Bjargingarfelag;  um at teir høvdu verið her vesturi men einki fyngu gjørt báðar ferðirnar, tí grind var o.s.fr. inntil fyrsta fundin – stovnandi fundin 6. desember 1974.

M. av Kák                               Sverri Nielsen

15. februar hittust Sverri Nielsen, Jens Erik Nielsen og Marni av Kák. Gjørdu limayvirlit, og avgjørdu at senda rundskriv til øll húsarhald í sýsluni um at tekna limaskap.

M. av Kák                                   Sverri Nielsen

18. februar varð starvsnevndarfundur.

Møttir vóru: Anton Guttesen, Jón Joensen, Ivan Johannesen, Jens Erik Nielsen, Sverri Nielsen og Marni av Kák.

Samtykt varð 8. mars 1975 at lýsa til aðalfundar 15. mars 1975 á skúlanum á Giljanesi við fylgjandi dagsskrá:

1.              Frágreiðing um virki felagsins
2.              Uppskot til felagslóg
3.              Val av nevnd + 3 tiltaksmenn
4.              Val av grannskoðara
5.              Ymiskt

Limayvirlitið vísir, at limatalið er 167.

M. av Kák                 Sverri Nielsen                 Ivan Johannesen

5. mars vóru Sverri Nielsen og Marni av Kák í Mykinesi – í samband við grannastevnu um uttangarðsútskifting – og høvdu teir høvi til at siga frá felagnum. Sverri greiddi frá um greiðirnar og handaði Martin Danielsen børuna, sum Norðoya Bjargingarfelag hevur latið.

Rundskriv vóru latin í húsini.

M. av Kák                         Sverri Nielsen

14. mars, kl. 20.00, varð fyrsti vanligi aðalfundur í Vága Bjargingarfelag hildin á felagsskúlanum á Giljanesi.

Aðalfundurin var lýstur í ”Dimmalætting” 6. mars 1975, í útvarpinum og við gøtuuppsløgum við fylgjandi dagsskrá:

1.              Frágreiðing um felagsins virki
2.              Uppskot til felagslóg
3.              Val av nevnd og 3 tiltaksmonnum
4.              Val av grannskoðara
5.              Ymiskt.

Ad 1. Sverri Nielsen og Marni av Kák greiddu í stuttum frá um felagsins virki frá stovningardegnum 6. desembur 1974 til dagin í dag.

Ad 2. Lógaruppskotið varð lagt framm, og aftaná gjølliga viðgerð, samtykti aðalfundurin soljóðandi

Felagslóg

Fyri

Vága bjargingarfelag

§ 1.

 Navn felagsins er Vága Bjargingarfelag
Felagið umfatar Vágarnar og Mykines
Heimstað felagsins er Vágarnar.

§ 2.

Felagið er sjálveigandi stovnur og hevur sum endamál at veita hjálp, tá ið á stendur á sjógvi og landi, at vekja ans fyri bjarging, at útvega bjargingartól, at venja fólk til at nýta tey, at arbeiða fyri, at eitt bjargingarskip verður til taks, og at ein bjargingar – og sjúkraflutningsbilur verður til taks í Vágunum.

Felagið eigur at samstarva við onnur feløg við sama endamál, og má kunna ganga í landsfelagsskap við øðrum bjargingarfeløgum í Føroyum.

Felagið er limur í Føroya Bjargingarfelag.

§ 3.

Sum limir kunnu gerast kommunur, onnur feløg og einstaklingar.

§ 4.

Limagjaldið verður ásett av ársaðalfundinum.
Limagjaldið fellur til gjaldingar 1. apríl á hvørjum ári.
Kvittan fyri limagjald er atgongumerki til felagið.
Limir, ið ikki hava goldið aftaná tvær krevjingar, missa limarættin.
Roknskaparárið er álmanakkaárið.

§ 5.

 Felagið heldur ársaðalfund í mars mánaði.

Aðalfundur verður lýstur við 8 daga ávaring í ”Dimmalætting” og Útvarp Føroya við hesi dagsskrá:

1.    Frágreiðing um felagsins virki í farna árinum.
2.    Framløga av ársroknskapi til góðkenningar.
3.    Val av nevnd og 7 tiltaksmonnum.
4.    Val av 2 grannskoðarum.
5.    Ymiskt.

§ 6.

Aðalfundurin hevur hægsta ræði í øllum viðurskiftum felagsins.

Atkvøðurætt á aðalfundi hava allir limir.

Kommunur ella feløg verða umboða av einum limi hvør.

Eykaaðalfundur kann haldast, tá nevndin avger tað. Í øðrum førum kunnu í minnsta lagi 25 limir krevja eykaaðalfund við samstundis at tilskila eina dagsskrá.

Aðalfundurin velur ein fundarstjóra til at stýra fundinum.

Allar avgerðir á aðalfundinum krevja vanligan meiriluta.

Lógarbroytingar og avtøka av felagnum kunnu bert gerast á ársaðalfundinum og krevja 2/3 meiriluta av teimum, sum møttir eru.

§ 7.

Í nevndina verða valdir 7 limir, ein úr hvørjari bygd í sýsluni, sum sita til næsta vanliga ársaðalfund. Næsta ársaðalfund fara 3 frá, triðja ársaðalfund 3 og fjórða 1. Hetta verður tey fyrstu árini gjørt við lutakasti.

Fráfarandi nevndarlimir kunnu verða afturvaldir.

Nevndin skipar seg við formanni, næstformanni, kassameistara og umsjónarmanni, sum umsita ognir felagsins.

Nevndin hevur fund, tá ið formaðurin ella næstformaðurin kallar til fundar, ella í minnsta lagi eina ferð um fjórðingsárið, ella tá tveir nevndarlimir krevja fund.

Fundirnir eru viðtøkuførir, tá ið 4 limir eru á fundi, og allar avgerðir krevja vanligan meiriluta.

Formaðurin hevur umsorgan fyri, at gerðabók verður førd um tað, sum fer framm á fundunum.

Kassameistarin hevur umsorgan fyri, at limagjald verður uppkravt og roknskapur førdur.

Sýslumaðurin er fastur skrivari felagsins og hevur møtirætt á hvørjum fundi.

§ 8. 

Nevndin ger eina til eina og hvørja tíð tíðarhóskandi arbeiðsreglugerð.

Ad 3:          Í nevndina vórðu valdir:

Ad 5.        Árslimagjaldið varð samtykt at vera 25 krónur.

22 mars, kl. 15.00, varð nevndarfundur hildin.

                 Allir teir valdu nevndarlimirnir vóru møttir uttan Jákup Jacobsen Úr Mykinesi.

                 Nevndin skipaði seg soleiðis:

                 Formaður                             Sverri Nielsen
                 Næstformaður                      Ivan Johannesen
                 Kassameistari                     Karl Jóhan Nielsen
                 Umsjónarmaður (fyribils)    Sverri Nielsen

Vísandi til aðalfundarsemju peikaðu nevndarlimirnir Jón Joensen og Dávur Joensen á ávíkavíst Elias Petersen, Bøur, og Solberg Henriksen sum tiltaksmenn teirra.

          Nevndin samtykti, at felagið vendir sær til allar kommunurnar og reiðaríini í sýsluni um limaskap og stuðul.

          Samtykt varð eisini at boða fútanum, marinustøðini, flogvøllin, Føroya Bjargingarfelag og Havnar Bjargingarfelag um felagið, tess nevnd, og hvørjar greiðir felagið hevur v.m. Harumframt verður eisini sagt Vága Froskmannafelag frá.

          Undirnevnd varð vald at gera uppskot til arbeiðsreglugerð.

Nevndin er Sverri Nielsen, Ivan Johannesen og Marni av Kák.

          Til samarittarskeiðið hava 25 limir teknað seg.

Ivan Johannesen                       Karl Jóhan Nielsen

John Magnussen                       Dávur Joensen

Jón Joensen                               Sverri Nielsen

10. juni, kl.21.00, varð nevndarfundur hildin.

          Allir nevndarlimirnir vóru møttir uttan Jákup Jacobsen, Mykines.

          Formaðurin upplýsti, at samarittarskeið hevur verið í tíðini frá 1/4  til prógv vórðu givin 21/5.1975. Undir leiðslu av Georg Egholm, kommunulækna tóku niðanfyri nevndu prógv:

          Samtykt at skipa fyri bjargingarroynd í Selvíkum leygardagin 14. juni 1975, kl. 14.00, har allur reiðskapur felagsins skuldi roynast.

Skriv 7. apríl 1975 frá marinustøðini og skriv 20. mai 1975 frá Norðoya Bjargingarfelag vórðu viðgjørd.

          Vísandi til at bretski bjargingarbáturin kemur á Miðvág sjálvan vestanstevnudagin, 13. juli 1975, varð nevndin samd um, at tað var ovmikið samstundis at hava vitjan av verjuskipinum. Hildið var eisini, at meira fekkst burturúr, um verjuskipið demonstrerar bjargingargreiðir sínar ein dag, tá eingin stevna er. Sostatt varð samtykt at stíla ímóti eini vitjan frá verjuskipinum umleið miðjan august í ár, soleiðis at eisini betur stundir verða til at taka sær av bretska bjargingarbátinum.

Sverri Nielsen             Ivan Johannesen                 Karl Jóhan Nielsen

Jón Joensen                 John Magnussen

14. juni, væleydnað bjargingarroynd í Selvík.

13. juli var vitjan í Miðvági av bretska bjargingarskipinum ”Grace Paterson Ritchie”.

          Vága Bjargingarfelag skipaði í samstarv við Norðoya Bjargingarfelag fyri ein busstúr um oynna og døgverða í Sørvágs Bio, aftaná at bjargingarskipið var sæð og materiellið umborð demonstrerað.

Sverri Nielsen

16. juli var Føroya Landsstýri vertur við ein døgverða á Hotel Hafnia fyri manningini á bretska bjargingarskipinum, føroyskum bjargingarfeløgum o.fl. – Sverri Nielsen og Marni av Kák umboðaðu Vága Bjargingarfelag.

Sverri Nielsen

11. august biðjur Dolfinarium Haarderwijk, Háland, Bjargingarfelagið um at hjálpa sær við at taka livandi grindahval. Dolfinarium letur allar greiður til tess. – Samsýningin er: fyri 2 hvalir ein sjógangandi gummibát – fyri 6 hvalir harumframt ein 50 hh Mercury páhangsmotor.

          Við á hesum fundi vóru F. B. Den Haarder, W. H. Dudok van Heel, Sverri Nielsen, Ivan Johannesen og Marni av Kák.

          Á fundinum, sum fór fram á hotellinum í Miðvági, varð skjal um avtaluna sett upp, og víst verður til tað.

Sverri Nielsen                  Ivan Johannesen

20. august hendi vanlukka á Leitisvatni, har Johan Hansen, Miðvági, druknaði.

          Hetta var fyrstu ferð, at heitt varð á Bjargingarfelagið um at luttaka í vanlukkustøðu.

Sverri Nielsen

3. september demonstreraði manningin á HMS ”Fylla”, ið lá í Sørvági saman við ”Teistin” bjargingartilfar við meir har umborð fyri áhugaðum / tilkallaðum limum í Bjargingarfelagnum.

Sverri Nielsen

23. september, kl. 20.00, var fundur í skúlanum í Sørvági millum nevndina í Vága Bjargingarfelag og Vága Froskmannafelag.

          Nevndarlimirnir Sverri Nielsen, Ivan Johannesen, John Magnussen og Jón Joensen vóru møttir fyri Bjargingarfelagið.        

          Endamálið við hesum fundi, sum Froskmannafelagið hevði biðið um var:

1.              Froskmannafelagið sum deild av bjargingarfelagnum.
2.              Treytir fyri felagsskapin.
3.              Studning frá Bjargingarfelagnum til Froskmannafelagið.
4.              Felagsútvalg – arbeiðsútvalg.
5.              Lán av gummibáti.
6.              Ymiskt

Fundurin snúði seg mest um, at Froskmannafelagið hevur

fíggjarligar trupulleikar í samband við ein luftkompressara, sum teir hava cautiónslán í uppá til rest umleið 10.000 kr.

          Tosað var aftur og fram um málið, og fundurin endaði við, at Bjargingarfelagið vildi taka støðu til málið í síni heild á einum nevndarfundi skjótast gjørligt.

Sverri Nielsen                   Ivan Johannesen

Jón Joensen                       John Magnussen

25. september, kl. 20.00, var fundur hildin av nevndini hjá skrivaranum.

          Møttir vóru: Sverri Nielsen, Ivan Johannesen, Karl Jóhan Nielsen, John Magnussen og Jón Joensen.

          Til viðgerðar var spurningurin um upptøku av Vága Froskmannafelag í Vága Bjargingarfelag.

          Nevndin er samd um:

Sverri Nielsen                   Ivan Johannesen

Karl Jóhan Nielsen            Jón Joensen

John Magnussen

26. september sendir Bjargingarfelagið skriv til Vága felags kommunur við umbøn um studning 10.000 kr. til yvirtøku av áður nevnda kompressara.

Sverri Nielsen

1. oktober,  kl. 20.00, hevði nevndin bjóða øllum grindaformonnum í oynni, froskmonnum, tiltaksnevndarlimir og ávísar vanligar limir til orienterandi fund um tøku av livandi grindahvali og ætlanini við hesum.

          Ein filmur um delfinir og aðrar hvalir og tøku av grindahvali í California vórðu vístir.

          Tað tyktist, sum um menn yvirhøvur eru vinarliga sinnaðir til tiltakið, ið kemur Bjargingarfelagnum til góðar.

          Nevndu filmir, ið Dolfinarium Harderwijk hevur lænt felagnum, eru vístir á báðum skúlunum í oynni.

Sverri Nielsen

18. oktober var grind hildin til í Bø. Tað eydnaðist at taka ein livandi óskaddan hval í góðari stødd. Tá Dolfinarium vil hava minst 2 í senn, varð hesin eini sleptur.

          Grindin var annars lítil: 29 hval – 177 skinn.

Sverri Nielsen

24. oktober, kl. 20.00, var nevndarfundur heima hjá Sverri Nielsen.

          Møttir vóru: Sverri Nielsen, Ivan Johannesen, Karl Jóhan Nielsen, John Magnussen og Jón Joensen.

          Til viðgerðar vóru fylgjandi mál:

1.  Skriv dags. 23. oktober 1975 frá bygdaráðunum í Vágum, sum hava játtað felagnum ein studning uppá 10.000 kr. til yvirtøku av luftkompressara. - Kassameistarin fekk álagt at fáa hendur á peninginum.

2.   Viðvíkjandi bjargingarroyndina í Sundalagnum 25. oktober 1975

  varð samtykt ikki at fara og at boða Norðoya Bjargingarfelag, at tað ikki liggur fyri at koma.

3.   Viðvíkjandi upptøku av Vága Froskmannafelag sum lim í Bjargingarfelagnum varð samtykt at samráðast við Froskmannafelagið um upptøkutreytirnar. – Vísandi til upptøkutreytirnar frá 25. september 1975, varð uppskot at samráðast um hetta:

Ad 1:     Froskmannafelagið rindar eitt vanligt limagjald árliga.

Ad 2a:   Yvirtøkan av kompressaranum fer fram sum ætlað.

Ad 2b:    Froskmannafelagið hevur ábyrgdina av tí dagligu røktini av kompressaranum, soleiðis at hann altíð er í góðum standi. Nevnd Vága Bjargingarfelags hevur til eina og hvørja tíð atgongd til kompressaran.

Ad 2c-d:    Standa við.

Ad 2e:       Hesum punkti viðvíkjandi er nevndin hugað til at tingast við Froskmannafelagið.

Ad 3:  Froskmannafelagið gevur 2 ferðir árliga yvirlit yvir aktivar limir í felagnum, og valdur verður ein kontaktlimur fyri Froskmannafelagið.

4.        Viðvíkjandi skriv frá Havnar Bjargingarfelag (ikki dagsett) og skriv 23. oktober 1975 frá Føroya Landfúta um Føroya Bjargingarfelag.

Nevndin samtykti at hava nevndarfund 28. oktober 1975,

kl. 20.00, fyri tá at leggja til rættis innbjóðing til fund til stovnan av einum meginfelag fyri bjargingarfeløg 15. ella 16. november 1975.

5.       Spurningurin um at finna annað høli til reiðskap felagsins. M.a. bjóðaði Marni av Kák sær at kanna møguleikarnar.

6.       Spurningurin um trygging av reiðskapinum varð umtalaður. Verður at kanna.

Sverri Nielsen                    Ivan Johannesen

Karl Jóhan Nielsen            Jón Joensen

John Magnussen

27. oktober, kl. 20.00, var nevndarfundur heima hjá Karl Johan Nielsen.

       Møttir vóru: Sverri Nielsen, Ivan Johannesen, Karl Jóhan Nielsen, Anton Guttesen og Jón Joensen.

       Til viðgerðar var spurningurin um fyrireikan av stovning av einum meginfelag fyri bjargingarfeløg í Føroyum.

       Samtykt varð at bjóða øllum bjargingarfelagsnevndum í Føroyum til fundar vesturi í Vágum leygardagin 15. oktober 1975. Eisini fútin verður bjóðaður.

       Ætlanin er um gjørligt at halda fundin í fundarhøllini á ellis – og avlamisheiminum.

       Tað varð samtykt at hava hesa fundarskrá:

Kl. 14.00 – Koma og kaffimunn
-    14.30 – Formaðurin í Vága Bjargingarfelag, Sverri Nielsen, bjóðar vælkomin.
-                  Ivan Johannesen, hugleiðingar um fyrimunir við einum meginfelag.
-    15.15    Fútin um bjargingartænastuna í Føroyum.
-    15.45    Pausa
-    16.00    Orðaskifti um stovnan av meginfelag.
-    17.30    Niðurstøða
-    18.00    Náttverði
-    19.00    Fráfaring
-    19.30   ”SAM” frá Oyragjógv.

Innbjóðing við nevndu fundarskrá og praktiskum upplýsingum

verður send beinleiðis, skrivliga til hvørt einstakt bjargingarfelag í Føroyum.

          Sverra Nielsen varð álagt at kanna, um høli og matur / drekka kann fáast á ellisheiminum. – Marni av Kák skal tosa við fútan og annars fáa tað skrivliga frá hondini.

          At verða skrivari og orðstýrari á fundinum valdust ávíkavíst Jens Erik Nielsen og Marni av Kák.

          At enda varð samtykt at keypa eina gerðabók til nevnda fund.

Anton Guttesen                 Karl Jóhan Nielsen

Ivan Johannesen                Sverri Nielsen

Jón Joensen

15. november, kl. 14.15, á ellis- og avlamisheiminum í Miðvági varð tann hin 27. oktober 1975 fráboðaði fundurin um stovnan av einum meginfelag fyri bjargingarfeløg í Føroyum settur av Sverri Nielsen.

          Hesir vóru møttir:

úr Fuglafirði - Theodor Jacobsen, Eilif Hansen og Símun Abrahamsen,

av Eiði – Poul Vatnsdal, Hans Edv. Høghamar og Herman Mørkøre,

úr Kollafirði – Niels P. av Steinum, Øssur av Steinum og Hans Thomsen,

úr Havn – Guttorm Eysturoy, Haldór Jóansson, Rólant Patursson, Gudmund Isfeldt, Páll Klein og fútin Klerens,

úr Vágunum – Sverri Nielsen, Ivan Johannesen, Jón Joensen, Jákup Jacobsen, Karl Jóhan Nielsen og Elmar Poulsen.